korpo

*korp/o

1. ĉe homoj kaj bestoj, aro de la materiaj partoj, kiuj konsistigas la organaron: pli granda ol la korpo de ordinara rano (Z); ŝi ne havis piedojn, la korpo finiĝis per fiŝa vosto (Z); tremo trakuris sian korpon (Z); ektremi per la tuta korpo (Z); (io) saniga por via korpo (Z); fortika, kaduka korpo (Z); kuraĝu nun ekpalpi mian korpon per malĉasta tuŝo! (Z); la korpo disfalis en cindron (Z); ĉeesti per propra korpo; ne la edzino, sed la edzo rajtas pri ŝia korpo; tiel same ankaŭ ne la edzo, sed la edzino rajtas pri lia korpo (N); kuri de sia propra korpo (Z) (timegi).
   karno, osto.

2. La materia parto de homo kontraste kun la spirita: se kune kun la korpo ankaŭ la spirito kripliĝis (Z); ili vivas per unu animo en du korpoj (Z); forsavi sian korpon kaj animon (Z); klopodi sen limo per korpo kaj animo (Z); mi aliĝos per la tuta korpo kaj animo al la partio (Z); (f) se prosperus al ili, al la nomo de sia projekto ellabori ankaŭ sin teni povantan korpon (Z); [KRISTANISMO] la korpo de Jesuo Kristo (eŭkaristio).

3. Tiu materia parto senigita de la spirita: senviva korpo (Z); mara junko, kiu aspektis kiel korpo de homo (Z); la korpon venigu do en preĝejon (Z); dissekci korpon.
   kadavro.

4. Trunko de homa aŭ besta korpo: li detranĉis al li la kapon kaj enterigis ĝin kune kun la korpo (Z); la korpo kaj la membroj; ŝi kaptis lin ĉirkaŭ la korpo (Z).
   talio.

5. La ĉefa parto de objekto: la korpo de ŝipo, de flugboato; la korpo de violono, gitaro; en la korpo de la dokumento.
   kerno.

6. ĉia agregaĵo de materiaj eroj: ĉiuj korpoj havas dimension kaj pezon; organika, neorganika korpo; simpla, kombinita korpo; pura korpo; solida, likva, gasa korpo; fremda korpo en la okulo (Z); la steloj estas korpoj de universo (Z); nigra korpo (Vd nigra 6).
   substanco.

7. [ANATOMIO] Nomo de diversaj organoj, i.a. flava korpo, stria korpo kaj vitreca korpo.

8. (f) Relativa denseco, solideco de io: tiu ŝtofo ne havas korpon; jen vino, kiu havas korpon!

9. [MATEMATIKO] Ringo, en kiu oni povas dividi per ajna elemento nenula: la aro de ĉiuj reelaj nombroj konsistigas korpon; per aljungo de nulejo de nemalkomponebla (nereduktebla) polinomo oni ricevas pluigaĵon, kies grado egalas al la grado de la polinomo.