libro

*libr/o

(en antikvaj tempoj) Kopio de verko sur folioj el ŝelo, papiruso, ledo k.a. , unuflanke skribitaj kaj kungluitaj en unu strion volvatan ĉirkaŭ ligna cilindro: tiu libro, granda pergamena rulvolvaĵo (Z); la ĉielo formoviĝis, kvazaŭ kun volvata libro (N).
manuskripto, tabelo.

Kungluita aŭ kunkudrita foliaro el papero aŭ alia materialo, kun presita aŭ fotoreproduktita teksto: fermi, malfermi libron (Z); tiu ĉi libro havas 60 paĝojn (Z); li derompis la rozon, premplatigis ĝin en libro (Z); legu en via libro! (Z); (f) ŝlosita (Z), sigelita libro (N) (kiun homo ne povas malfermi).
bindaĵo, kajero, formato, volumo, tomo. [VIDU] libroapogilo, librokovro, libropruntejo, librotenado, librovendado.

Proza aŭ poezia verko, kiu presite plenigas tian foliaron: tio estas ja metio verki libron, same kiel fari horloĝon; malnova historia libro (Z); li ĵetis kaŝitan rigardon en sian libron de geografio (Z); verkisto verkas librojn (Z); li parolas kiel libro (tro science); la sanktaj libroj (la Biblio); la Libro (Biblio aŭ Korano); recenzi la librojn.

ĉiu el la grandaj dividoj de verko: la unua libro de Tito Livio; la libro de Genezo.
ĉapitro, kanto, volumo.

Samforma kolekto da diplomatiaj dokumentoj, disponigitaj de registaro al la parlamento: blanka, flava, blua libro; (f) nigra libro (kolekto de dokumentoj pri politikaj krimoj ks).

Samforma kolekto de blankaj folioj, destinitaj por surskribado: li estis okupita je skribado de kalkulo en granda libro (Z); ora libro (sur kiun oni skribis orlitere la nobelajn familiojn; nun, sur kiun oni registras la nomojn de famaj vizitantoj).
albumo.

Listo, kun religia signifo: jen estas la libro de naskoj de Adam (X); ili estu elstrekitaj el la libro de vivantoj (X); la libro de l' Sorto.

(f) ĉio, el kio oni povas ellerni: studi la grandan libron de la Naturo; la granda libro de la mondo.

libra

Rilata al libro (j): la libra merkato; en libra formo.

ĉerpita nur el libroj, kontraste kun la sperto: libraj scioj; scii lingvon libre, ne libere.
kabineta.

libraĉo
Senvalora libro.

libraro
Kolekto da libroj, traktantaj pri unu temo, aŭ eldonitaj de unu eldonisto, aŭ kunigitaj en unu loko.

librejo
Vendejo de libroj: ŝi timis, ke ŝi trovos en la librejo aĉetantojn, en kies ĉeesto ŝi ne povus [...] (Z); krom la mastro de la magazeno en la librejo estis nejuna homo (Z).
biblioteko.

libreto

Maldika, mallonga libro: la intenco de la firmo H. eldoni grandan serion da libretoj E-aj (Z).

Libro, enhavanta la vortojn de operverko.

Tiuj vortoj mem.

libristo
Vendisto de libroj: la libristo staris malantaŭ la magazena tablo (Z); la libristo envolvis en paperon la bluan volumeton (Z).

librujo
Ujo el ledo aŭ simila materialo, en kiu la lernantoj portas siajn librojn, kajerojn ktp.
dokumentujo, teko.

adreslibro
Registro de la adresoj de la loĝantoj de urbo, de la anoj de profesio, partio ks, en formo de libro.

ĉeflibro
[KOMERCO] Libro, en kiu oni registras la aktivaĵojn kaj pasivaĵojn en konto.

determinlibro
[BOTANIKO] [BAKTERIOJ] [BIOLOGIO] Libro speciale verkita por ebligi determinon de vivuloj: determinlibro pri florplantoj.

evangelilibro
Libro entenanta la kvar evangeliojn.

gvidlibro
Libro donanta informojn por turismo; (f): la Parnasa Gvidlibro.

jarlibro
Libro ĉiujare aperanta kaj prezentanta la ĉefajn okazontaĵojn de la jaro, aŭ fundamentajn informojn, ĉiujare ĝisdatigitajn, pri iu societo aŭ fako: la jarlibro por 1897 (Z); la Jarlibro de UEA.

kaslibro
[KOMERCO] ĵurnalo, en kiu oni registras la monajn el- kaj en-spezojn.

legolibro
Kolekto de elektitaj legaĵoj por la studantoj de lingvo.

*lernolibro
Libro, kiu prezentas por lernanto la ĉefaĵon de lingvo, scienco, arto, ordinare en formo de sinsekvaj lecionoj kun ekzercoj: mi eldonis rusan, anglan kaj svedan lernolibron (Z); (f) la urbo Florenco estas tuta lernolibro, se oni nur volas folii en ĝi (Z).

loglibro
Libro, en kiu la ŝipestro konstante notas ĉiujn okazaĵojn de la navigado, inkluzive de la trairitaj distancoj montritaj de la logo.
taglibro.

manlibro
Malgranda libro, por kutima uzado, kun la plej ofte bezonataj informoj, ideoj ktp: manlibro de inĝenieraj formuloj; la manlibro de Epikteto.

martirlibro
Kristana libro pri la martiroj.

memorlibro
Verko, registranta memorindajn okazaĵojn.
analoj, kroniko.

mendolibro
Libro, en kiu komercisto, industriisto enskribas la mendojn de siaj klientoj.

meslibro
Libro entenanta la preĝojn por la meso.

notlibro (Z)
Libro el blankaj paĝoj, sur kiun oni notas la memorindaĵojn.

poŝlibro (Z)
Libro sufiĉe malgranda, por povi esti enŝovata en poŝon.

preĝolibro
Libro kun la preĝoj direndaj dum la tago: la maljuna avino sidis antaŭ la pordo kaj legis en sia preĝolibro (Z).
horo.

registrolibro
Libro, destinita por registrado.

ringolibro
Libro por notoj, el dokumentoj ks, kaj kies folioj estas kuntenataj de metalaj aŭ plastaj ringoj.

ŝuldolibro
Libro, en kiu pruntisto enskribas la ŝuldojn de la debitoroj: la hebreoj, sufiĉe malamataj pro sia riĉeco kaj siaj ŝuldolibroj (Z); (f) kion mi faris, tiom mi sendube iam legos en la ŝuldolibro de la ĉielo (Z).

taglibro

Libro, en kiu iu persono rakontas, tagon post tago, siajn travivaĵojn: la romantikuloj ofte tenis taglibron; la 'Taglibro' de Goeto (poemo).
ĵurnalo.

[ŜIPOJ] Libro, en kiu estas skribata ĉio pri la navigado kaj la okazaĵoj inter la ŝipanoj.

telefonlibro
Granda libro, entenanta la liston de la abonantoj de telefonreto kaj ilian voknumeron.

vetolibro
Libro, en kiu bukmekro notas la ricevitajn vetojn.

libro

Esprimoj

Admiru la nudecon de lia stilo.
Bele tornita frazo.
Definitiva, elĉerpita eldono.
Doni reliefon al sia stilo.
Eldono kun notoj.
Figurriĉa stilo.
Honorarioj de aŭtoro de libro.
Jurisprudenco pri aŭtora proprieto.
Klareco estas la distingo (marko) de bona stilo.
Kopii laŭ la originala manuskripto.
Kultismo (afekta, rafinita prilaboro de la stilo).
La atingo de mia brako ne estis sufiĉa por kapti la libron el la breto.
La fono de la romano estas Nederlando.
La libra merkato.
La noveco de tiu stilo ne kompensas ĝian malbelecon.
La pompo de la stilo ne sufiĉas por kaŝi la senhavecon de la verko.
Lasi liberan flugon al sia fantazio
Legi libron per unu spiro.
Li rakontis pecon el sia] bubaj jaroj.
Libro broŝurita, lede bindita.
Libro de eleganta tipografio.
Libro dividita en 30 ĉapitroj.
Luksa eldono.
Malkonfesi verkon.
Manuskripto prespreta.
Misloki libron en biblioteko.
Nuanco de stilo.
Omaĝi al iu per dediĉo de libro.
Papilie tralegi libron.
Pika originaleco de la stilo.
Provizi bibliotekon per binditaj libroj.
Rajto de aŭtoreco.
Rebaki la tutan verkon.
Rezigni la aŭtorrajton.
Sendi librojn kun pagoŝarĝo
Teksto farĉita per ŝablonaj, gurditaj, banalaj esprimoj.
Tio estas frukto de lia unuatempa verkado.
Unuformeco de la stilo.
Ĉerpi materialon el ies verko.

libro

*libr/o

libro

Esprimoj

Kelkaj kunmetaĵoj

Vortoj uzitaj en la sama ĉirkaŭkunteksto

Ankaŭ vidu:

Iel rilatitaj: