kopii

Reprodukti tekston je unu aŭ pluraj ekzempleroj, mane aŭ maŝine: kopii leteron, poemon, dokumenton, malnovan manuskripton.
transskribi.

[FOTOGRAFIO] Fari pozitivan fotografian bildon, ĝenerale sur papero, de negativa bildo sur filmo, aŭ de diapozitivo. SIN. presi 3.

(f) ĝuste imiti: kopii ies gestojn; kopii la voĉon de aktoro (Z); ĉion strangan kaj malbelan Kay povosciis kopii tre trafe (Z); kiel pentraĵo ĉio klare kopiiĝis en (la akvo) (Z).

kopio
Ago kopii kaj precipe ties rezulto, t.e.

ĝusta reprodukto de skribaĵo, pentraĵo ks: li transskribu al si kopion de ĉi tiu instruo en libron (X); tiu skribmaŝino povas liveri ĝis dek kopiojn; ofte oni trompas naivulojn, vendante kopiojn anstataŭ originaloj (B); kopilibro, kopirajto.

(f) Pli-malpli bona imitaĵo: tia traduko donus malĝustan kopion de la tradukita verko (Z); mallerta kopio de ĉefverko.
plagiato.

kopia
Rilata al kopio: kopia papero (= kopipapero).

kopie
Pere de kopio: kopie multobligi cirkuleron; (f) ŝi estis kopie simila al la bela knabino (Z).

kopiado
Agado de tiu, kiu kopias.

kopiisto
Tiu, kies metio estas kopii: la monaĥoj fariĝis la kopiistoj de la antikvaj manuskriptoj; kopiisto de muzikaĵoj.
skribisto.

miskopii
Erari, kopiante.

rekopii
Duafoje kopii.

trakopii
Paŭsi.

fotokopii
Kopii, utiligante specialan fotografilon.

fotokopiilo
Aparato por fotokopii.

premkopii
Kopii utiligante specialan premmaŝinon.

savkopio
[KOMPUTIKO] Rezerva kopio de datenoj por protekti kontraŭ perdo de la originalo: ĉiam faru savkopion.

ŝtelkopii
Kopii ion, ne ricevinte la permeson de la posedanto aŭ aŭtoro: ŝtelkopii parizajn altmodajn kreaĵojn.

telekopii
Faksi.

telekopio
Fakso.

telekopiilo
Faksilo.