vino

*vin/o

1. Alkohola trinkaĵo, konsistanta el fermentinta suko de vinberoj: juna vino (Z); dolĉa, seka vino; lakto estas pli nutra, ol vino (Z); glaso da vino; glaso por vino (Z); bona vino al la fino (Z) (la plej bona venas laste); akvon prediki kaj vinon trinki; vino, virino, tamburino (ĉiuj plezuroj de la vivo); la vino gajigas la koron de la homo (X); [KRISTANISMO] la konsekrita pano kaj vino (Z); (f) ili trinkas vinon de krimo (X); la loĝantoj sur la tero ebriiĝis per la vino de sia malĉasteco (N); oni ne enverŝas novan vinon en malnovajn felsakojn (N).
   mosto.

2. ĉiu el la diversaj tiaj trinkaĵoj, distingitaj laŭ sia speco, ecoj aŭ regiono: blanka vino (estiĝinta pro fermentado de mosto ricevita de blankaj vinberoj), roz(kolor)a vino (el ruĝaj vinberoj, kiuj fermentis nur parte maceruje), ruĝa vino (kiu ricevis sian koloron pro macera fermentado, nur post kiu ĝi estas elpremita); ĉi-jara vino (kiu ĵus finis sian fermentadon kaj kiun oni rajtas vendi dum tiu sama jaro ekde la mezo de la rikoltjara Novembro); vino kun nomo kontrolita (altkvalita); regiona vino (kun geografia originindiko); tabla vino (tablovino); Bordoza, Kalifornia, Rejnlanda vino; li regalas sin per bonegaj vinoj (Z); oni devas elekti la vinojn laŭ la pladoj, kiujn ili akompanos. [VIDU] vinbotelo, vinfarado, vingustumisto, vinmiksaĵo, vinpremejo, vinpremilo.

3. Fermentinta suko de aliaj fruktoj aŭ plantoj: palmovino; pomvino.