ŝati

*ŝat/i (tr)

1. Rigardi ion kiel valoran, gravan, havindan aŭ ĝuindan: la grandan amikecon de viaj intencoj mi ŝatas tre alte (Z); nobla viro devas dece ŝati la vorton de virino (Z); mi tre alte ŝatas la meritojn de la Pariza Grupo (Z); homoj, kies nomo, ankoraŭ tre malmulte konata kaj tre malmulte ŝatata, estas 'E-istoj' (Z); la malaperantaj, ĉiam malpli kaj malpli ŝatataj religioj (Z); mi ŝatas nur kuraĝon rektaniman (Z); nur suferinto ŝatas feliĉon (Z); tiujn kolektivajn dokumentojn la mondo ja ŝatas pli certe, ol [...] (Z); ĉion novan oni ŝatas (Z); bono posedata ne estas ŝatata (Z); la infanoj ne tre ŝatas longan babiladon (Z); ĉiuj ŝatis E-on ne tial, ke ĝi alproksimigas la korpojn de la homoj, sed nur tial, ke ĝi alproksimigas iliajn korojn (Z); la politiko ĉiam estis pleje ŝatata de ĉiuj (B); mi multe ŝatas belan manon (Z); (ŝi) ŝatis elegantajn bluzojn (M); ŝati kafon, la legadon.
   aprezi.

2. Havi favoran opinion pri iu: ŝatu amikon laŭ la dato de akiro (Z); ŝteletiston oni batas, ŝtelegiston oni ŝatas (Z); kiu hundon mian batas, min mem ne tre ŝatas (Z); oni tute ne havas la intencon ŝati ilin pli alte, ol kiom ili meritas! (Z); knabino kiu vin estimas kaj ŝatas, kvankam ŝi vin ankoraŭ ne amas (Z); la rolo de honesta homo, kiu ĝojas, se lia edzino estas ŝatata (Z); tiajn hundojn mi tre ŝatis, eĉ amis (M).
   estimi.

3. (+ infinitivo) Volonte, plezure fari ion: ĉu vi ŝatas danci, legi, naĝi?; aliaj ŝatas aktori en kvazaŭ teatraj roloj (M); mi ŝatus starigi ĉi-kuntekste kelkajn demandojn (M).