prezenti

*prezent/i (tr)

1. Meti ion antaŭ iu, por ke tiu ĝin prenu, vidu aŭ juĝu: prezenti tason al invitito, ŝtofojn al aĉetonto; prezenti kambion al banko; prezenti al la komitato rajtigan leteron (Z); prezenti al iu la manon; nun mi prezentos al vi la tabelon de tiuj novaj vortoj (Z); ŝmiraĵo estas prezentita sub la nomo de ciro (Z); (f) kion koro sentas, lango prezentas (Z); en mia letero mi volis prezenti al vi nur la principojn de mia projekto (Z); mi do kuraĝas prezenti al vi la motivojn, pro kiuj [...] ; prezenti proponon (Z); la unua kongreso, al kiu tiu ĉi verko estos prezentita (Z).
   proponi, almeti, antaŭteni.

2. Konduki iun antaŭ aliaj personoj kaj konigi tiun al ili: la princo prezentis sian fianĉinon al la kortego; cent jarojn (li) silentis kaj subite sin prezentis (Z); li leviĝis de la benko de la rigardantoj kaj prezentis sin, por ke la ridantaj Atenanoj povu kompari (Z); memvole prezenti sin por arestiĝo; (speciale: diri nomon de nekonato en societo) permesu, ke mi prezentu al vi mian amikon N. (B); mi havas la honoron min prezenti: poŝtestro Spekin (Z).

3. Starigi antaŭ ies imago la bildon de iu aŭ io: prezentu al vi mian embarason; al Vi, kiun ĉiuj malsame prezentas, sed ĉiuj egale en koro Vin sentas (Z); ŝi tute ne povis prezenti al si, ke la infano mortis (Z); la projektistoj prezentas al si la aferon tre facila (Z); ni prezentu al ni, ke kolektiĝis kongreso, por elekti lingvon internacian (Z).

4. Meti antaŭ ies okuloj imitaĵon de io, faritan per parolo, pentrado aŭ alia arto: la naturo estis preĝejo, kies veluran tapiŝon prezentis floroj kaj herboj (Z); la bildo prezentas virinon (Z); la skulptaĵo prezentis rozojn kaj tulipojn (Z); la dekoracio prezentas placon kun benkoj; la danco prezentis marŝon (B); mi prezentis Julion Cezaron (Z); tio estis verko simpla, prezentanta unu el la scenoj de la ĉiutaga vivo (Z); la trajtoj de la vizaĝo estis prezentataj (en la spegulo) tiel malĝuste, ke ili estis nerekoneblaj (Z).

5. Ludi antaŭ publiko teatraĵon aŭ filmon: mi prezentas la dramon 'Johanino M' (Z); tuj prezentu ion... ekzemple, ian patosan parolon (Z); ĉu vi povus prezenti la mortigon de Gonzago? (Z); se tio ĉi estas tro grandigata aŭ prezentata tro malforte, la kompetentan homon ĝi forte ĉagrenos (Z); tiu komedio ĝis nun neniam estis prezentita.

6. (io) Sin montri al ies menso sub unu el siaj aspektoj: la afero prezentas malfacilaĵojn (Z), grandan profiton, kelkajn avantaĝojn; tio prezentas tro grandan maloportunaĵon; kelkaj sonoj prezentas kelkan malgrandan malfacilaĵon por tiu aŭ alia nacio (Z); tiu protesto prezentas bonan okazon por diskuti pri jena principo; ŝia konduto prezentis nur vicon de nekonsekvencaj agoj (B).
   liveri, estigi, rezultigi.

7. (io) Montri la karakterizajn trajtojn de io; konsistigi: vesto homon prezentas (Z); ĉi tiu vortaro prezentas la duan parton de mia 'Plena Vortaro' (Z); du kontraŭ unu prezentas armeon (Z); ciferoj, kiuj prezentas nur groŝojn (Z); por ke la religio ne prezentu muron inter du homoj, estas necese, ke ili ambaŭ estu toleremaj (Z); lingvo internacia, kiu prezentus egalrajtan propraĵon de la tuta mondo (Z); prezentante pure kondiĉan rimedon de reciproka komunikiĝado, la lingvo internacia [...] (Z).
   formi.