ricevi

*ricev/i (tr)

1. Ekhavi iun ligitan al si per socia aŭ natura rilato: vi ricevos edzon (Z); ci ricevos mian filinon (Z); Pigmaliono ricevis sian Galateon (Z); la teatraĵo traktis pri du geamantoj, al kiuj la sorto ne permesis ricevi sin reciproke (Z); naskiĝis via patrino, poste ŝi ricevis gefratojn (Z); ili estis tre feliĉaj kaj ricevis multajn infanojn.
   akcepti.

2. Ekhavi per natura elkreskado: la bebo ricevis sian unuan denton; ricevi barbon; la arboj jam ricevis verdetajn foliojn; el ĉiu milo da semoj, kiujn ni pacience ĵetadis en la teron, apenaŭ unu ricevis radikojn (Z); (analoge) ricevi grizan haron (Z), dikegan ventron; mirtelojn ili manĝis, kaj ricevis tute bluajn buŝon kaj vangojn (Z); la arbo ricevis la plej belajn kolorojn! (Z).
   akiri.

3. Igi posedanto de io per dono, alsendo, aljuĝo ks: ricevi monon de patro (B), leteron de amiko (B); ricevi la unuan premion (Z); ricevi ordenon (Z), oficon de pastro (Z); ricevi profiton, rabaton, renton de bieno; (f) ricevi laŭdon, saluton, bonan akcepton, sian ĝustan lokon; ricevi komision, ordonon, helpon, sakramenton, viziton; kontraŭ s-ro Cart mi konstante ricevas plendojn (Z); en la riĉa domo neniam estis ricevitaj leteroj aŭ sciigo pri la filino (Z); (abs) kiu ne petas, tiu ne ricevas (Z).

4. Igi posedanto de io per interŝanĝo: doni ovon, por ricevi bovon (Z); hodiaŭ pagi vi devas, morgaŭ kredite ricevos (Z); por ĉiu tago mi ricevas kvin frankojn (Z); kie oni povas ricevi tiun specon de cigaredoj?; jam en Kjöge li volis aĉeti por ŝi oran ringon, sed li tion ne faris, ĉar en Kopenhago oni ja certe ricevos multe pli belan (Z); tian efikon havis la ŝmiraĵo, sed oni ankaŭ ne povis ricevi ĝin en apoteko (Z).

5. Esti tuŝita de io abstrakta, kaj esti de ĝi iel modifita: ricevi la vivon; de sia promenado li ricevis bonan apetiton; li denove ricevis la konscion (Z); teatramanto ofte vizitas la teatron kaj ricevas baldaŭ teatrajn manierojn (Z); la lingvo ricevas de tio grandan faciligon (Z); liaj ludoj ricevis tute alian karakteron (Z); ricevi fortan impreson, ies influon; la argilo ricevis formon de telero; ni baldaŭ ricevos ŝanĝon de la vetero.
   sperti.

6. Esti trafita de io malbona: ricevi fortan puŝon, baton (Z), vundon (Z); ventrodoloron oni ja ricevas tre facile en ilia aĝo (Z); mi ankaŭ ricevis artriton en unu artiko (Z); ricevi kapdoloron (Z); ricevi muŝon en la cerbon (Z) (frenezetiĝi); (abs. pp puno) prave li ricevas! (Z); ricevos vulpo por sia kulpo (X); ricevis bandito laŭ sia merito (Z).
   pagi, suferi.

7. [TEKNIKOJ] Estigi al si per sia propra ago: li lerte kunmetis kelkajn tabulojn kaj ricevis specon de kofro; el la gudro oni ricevas per distilado multajn derivaĵojn; (f) se ni aldonas la literon 't' ni ricevas vortojn montrajn (Z).

8. [TELEKOMUNIKOJ] Esti kapabla selekti difinitajn elektromagnetajn ondojn kaj transformi ilin en sonondojn: tiu aparato ne ricevas ultrakurtajn ondojn; (analoge) mi facile ricevas Romon, Moskvon; mi ricevas vin malbone.